小偷阿冬落難記

2009年1月15日(星期四)
由於家中貓之小食“味噌魚條”已經俾兩隻愛貓食晒，
是日我專登買了三條回家，並立即擺放在廳中食物櫃內，
有見小冬之前曾自行打開食物櫃左邊擺貓小食位置，
所以我今次擺去右邊上格與人類零食一起，仲要放得幾入吓~~
2009年1月16日晚上
當我地爬完深夜返歸一打開門時，立即見到食物櫃前地面有三個穿晒隆吉既“味噌魚條”包裝袋，
另外，地上還有一包薯片！
而小偷阿冬就好滿足咁坐係櫃前，個肚仔仲脹仆仆，哎呀，又偷食....
小冬偷食後連續兩天都嘔，食飯後仲嘔得緊要，而且佢開始呆吓呆吓，
我地係星期一晚帶小冬去睇屯門維多利，間診所又細，姑娘又惡，醫生又係老外，咩都診斷唔到，
但就要照x光，但又好大機會咩都照唔到，之後又話要驗血，可能係細菌感染，
但隻貓又無通街走，係間屋內又何來咁勁既細菌，又唔見貓兒有事？
兩樣加埋都成$1400，如果咩都驗唔到就要落顯影劑照片，又唔知幾銀？
之後搵咗個朋友太太，佢介紹了荃灣享和獸醫，約咗張醫生星期一下晝，
媽媽就的冬冬睇醫生，都係要做顯影劑但唔使做其他無謂測試，不過要入廠吊鹽水！
第二日我中午見醫生，佢話做完測試並無發現任何異物卡住係條腸，但發現冬冬有嚴重胃潰瘍，
需要留院食藥及繼續吊鹽水至少四天，即年廿九(星期六)
終於等到年廿九，我地揸車去接冬冬返屋企，見到冬冬四手都被人用膠布包實，
因為佢係住院期間太惡太緊張，時常用爪拍打鐵寵，搞到流血，所以俾人包到實一實！
但正因為包實晒，又帶出另一問題，就係隻右手右腳腫咗，要消毒，所以佢個頭罩無得除~~
之後數天，冬冬變得超嗲人，時刻都坐在我地大脾一齊睇電視，但隨著她身體一天一天康復，
我既為食貓冬冬又回來，大叫“快d開飯呀~~”