烏冬發牢騷

其實貓尾有好多唔同形狀，我條尾又長又尖又柔軟，行路時一擺一擺，簡直係性感；

之但係貓兒嗰條呢，就又短又掘，成條熱狗腸咁。

我哋條尾仲可以用嚟表達好多意思：好似驚嘅時候，我哋條尾啲毛會豎起哂，貓兒嗰條尾會變成好似厠所刷咁，我條尾最多算係奶樽刷啦；開心嘅時候我哋又會豎起條尾，行來行去；煩躁嘅時候條尾就會左右大力係咁擺。不過，無論點都好，貓，係唔鐘意俾人踩住條尾嘅！

事發喺噚日，話說當時我坐正喺廳中間等爸爸開飯，點知佢行來行去都唔開飯，正當我扮緊乖女，以最可憐嘅眼神提示佢我好肚餓之際，佢意然……踩住我條尾！！！

哇！痛死貓啦！有冇搞錯！人哋條尾扁咗啦！叫咗佢唔好著拖鞋㗎啦，要踩都踩貓兒啦，做乜踩中我喎，激死我啦……