貓兒的自白

我係花貓貓兒。我係烏冬爸爸同貓兒媽媽嘅第一隻貓。

話說2003年9月4日，愛護動物協會的哥哥姐姐將我由杏花村帶回協會。幾日之後，即係9月7日，爸爸媽媽無啦啦話要去愛護動物協會領養一隻貓，咁啱見我係咁用個頭挨挨擦擦，以為我好鐘意佢哋，咁就領養咗我啦！

之後，協會嘅姐姐話要做埋絶育手術至可以跟爸爸媽媽返屋企。咁惟有再住多幾日啦，點知，到咗10號，有個哥哥打俾媽媽，話依家同我做緊手術，不過見到有條深到肌肉嘅疤痕，喺手術附近位置，哥哥話可能我以前已經做咗手術，問媽媽仲做唔做，媽媽當然話唔做啦，不過都無啦啦麻醉咗一次，仲捱咗一刀...... 最後，終於喺9月11號，8號風球之下，我返到新屋企啦！

我係一隻好多嘢講嘅貓，成日自語自語，行過都會叫幾聲，好在我把聲幾好聽，唔似得烏冬叫到好似狗吠咁！

我最鐘意哂太陽，平日得閒，會喺窗台上面瞓吓晏覺。另外，我最憎洗耳仔，不過自從烏冬嚟咗之後，佢哋話烏冬會幫我洗，都冇洗耳仔好耐啦！

我亦都唔鐘意陌生人，最討厭嗰啲懶熱情，一入屋就衝埋嚟想摸我嘅人。通常見到有陌生人入屋，我都會第一時間呢埋，避開佢哋，留返烏冬喺出面。反正烏冬最鐘意玩，同邊個玩都冇所謂。

我覺得屋企最我嘅人就係媽媽，佢日日都幫我按摩，我想入衣櫃玩，佢有時都肯幫我開衣櫃門，爸爸淨係識得攞吸塵機出嚟嚇我。