親親爹d

鞋~~

近來工作真的比較忙， 多了工作要在晚間出動， 或者是星期六既早午晚全天候加班， 真的有點兒累... 現在中午時間都好鬼熱， 食完飯返到公司已經成身汗， 仲好鬼死臭，自己都頂唔順， 有次去街做完case，經過kpcc， 就走左上去沖個靚涼，舒服晒！

呢個星期由 monday 忙到friday， 終於等到而家先可以休息下，等放工。 爬石方面，梗係無偷懶，keep 住爬， 慢慢地成為我人生的一份， 好似以前返跆拳一樣， 我現在仲係爬石既白帶仔， 希望我可以好似跆拳那樣， 越排越前！

我家中的可愛小白貓，烏冬就越來越大脾氣， 佢大小姐一唔鍾意就“時”人， 都唔理會邊個俾飯佢食？ 惡到加零一！ 有一次我要去開大， 呀！隻烏冬竟然攤係屎坑前面訓覺， 我只好叫佢借個方便啦， 佢又唔係去廁所，唔好阻住下個先得架， 佢果晚心情可能勁差， 我輕輕的推佢，佢輕輕的閃， 但係閃左去浴缸，仲貓貓叫，長條型訓低唔走開， 當時我雖然有急事，但依然好好脾氣地又用口又用手， 要求我最可愛既烏冬小姐離開廁所， 呀！佢竟然食碗面返碗底， 佢凶我呀，凶我呀.... 哎呀~~ 無天莊，慘絕人寰，天理何在....？ 我如此這般錫佢，佢， 佢竟然好似凶其他人那樣“時”我！

頂！ 你不仁我不義，我一手捉住佢，另一手開水龍頭， 搵水淋佢，哇哈哈....睇你走得去邊？ 佢隻後腳俾我整濕左，拿拿聲踢住腳走到廁所門口， 不停地用條利整乾隻腳仔， 當時我雖然出左口氣， 但見到小烏冬好似好可憐係門口抹腳， 我都好過意唔去，我報以一個慰問既眼神之後， 就開大！

完事之後，打開隻門，見到小烏冬好像知錯，坐在廁所門口等我原諒佢，兩父女邊有隔夜仇丫？ 佢都貓貓叫，講對唔住，我梗係好大方俾個愛心抱抱佢啦，佢不知幾陶醉仲親親爹d ~~ 樂透！