烏冬的自白

我係一隻白雪雪，滑溜溜的港產家貓，叫做‘烏冬’，洋名叫Udon， 雙子座，今年1歲，喺吉澳某個地盤出世。

我啱啱返屋企嘅時候好細隻，一隻手掌都攞得起，仲成身蚤。試過有一日，我行過餐枱，竟然留低咗條蟲喺枱面。嚇得爸爸媽媽立即帶我去睇醫生杜蟲。不過依家，我已經變成一隻愛清潔嘅白貓，日日都沖好多次涼。

我由細到大都咁活潑好動，最鍾意玩攀登運動，我好細個就已經征服咗全屋最高嘅羅馬窗簾，後來更成功以solo形式on sight flash咗地勢險要嘅睡房門添呀，勘稱為家中最成功嘅攀登家。

我嘅第二嗜好係撩‘貓兒’打交。貓兒係隻大我兩年嘅花貓，平時好似好好恰咁，打起交上嚟鬼死咁惡，成日嘶嘶聲嚇我，不過，我一啲都唔驚佢。一年以來，我哋打過上百場交，最激列嗰次我哋仲將個廁所水箱篕踢咗落地，打爛咗添。

除咗打貓兒之外，我都鍾意瞓覺同食飯。閒日下晝一隻貓瞓哂成張牀，簡直係人生一大樂事。至於食飯，我係一隻大食貓，我餐餐都食得多過貓兒，唔係點會咁快高長大喎！

我覺得成間屋裏面同我最夾嘅人就係爸爸，佢同我一樣咁識嘆世界，成日同我一齊瞓覺，不過佢成日瞓瞓吓轉身踢到我。